Yolanda Carbajales centra a súa actividade na técnica denominada "mezzotinta", coñecida tamén como "maneira negra", na que se converteu nunha sobranceira experta, de notable prestixio dentro e fóra do noso país.

Maite Meixide, amais do gravado propiamente dito, realiza "collages" cunha gran pericia e unha entrañable sensibilidade coas que logra transmitir un notable sentido da estética.

Ana Barbará emprega unha pluralidade de técnicas como son a augaforte, a punta seca, o carborundo, o gravado ao linóleo etc. nas que demostraunha grande habilidade que sabe logo contaxiar ao seu alumnado de arte.

Leonardo Rial, tamén entusiasta profesor, amosa preferencia pola colografía e diversas técnicas aditivas.

Andrés Conde, notable gravador, centra dende hai tempo a súa actividade artística na escultura.

Antonio Pedreira revela unha marcada preferencia pola xilografía ou gravado en madeira.

Agardamos que esta mostra expositiva sirva para que a modalidade artística do gravado, con múltiples e ben demostradas posibilidades no eido da arte, sexa mellor coñecida e, por conseguinte, se cabe, mellor valorada e apreciada.